"என்னங்க.. உங்க அம்மா நேத்து ராத்திரியே சாப்பிட்டலே. கேட்டதுக்கு வயிறு சரியில்லேனு சொன்னாங்க. இப்ப இன்னும் ரூமை விட்டு வெளியே வரலே. நீங்க போய் என்ன ஏதுன்னு விசாரியுங்களேன்.எங்கிட்டே அவங்க எதையும் சொல்ல மாட்டாங்க " என்று மனைவி சொல்ல, "ஏன்.. நேத்து ஏதாவது பிரச்னையா ?" என்று கேட்டார் கணவர்.
"அதெல்லாம் ஒண்ணுமில்லே.. ரொம்ப வருஷத்துக்குப் பிறகு என் பிரென்ட் மாலினி இங்கே வந்திருந்தா.. மத்தபடி எல்லாம் ஆஸ்-யூசுவல்"
"அவங்க வந்ததை நேத்து சொல்லவே இல்லை. பார்த்து எவ்வளவு வருஷம் ஆச்சு. எப்படி இருக்காங்க. வெளிநாட்டு அனுபவம் எப்படி இருக்கிறதாம் ?"
"நேத்து நீங்க வீட்டுக்கு வர்றச்சே ராத்திரி மணி பன்னிரண்டு. அந்நேரம் இதை சொல்லிட்டு இருந்தா மத்தவங்க தூக்கம் கெட்டுடும் .. அதான் சொல்லலே.. நீங்க முதல்லே உங்க அம்மாவை விசாரியுங்க " என்று மனைவி சொன்னதும் அம்மாவின் ரூமுக்கு சென்றவன் "என்னம்மா .. உடம்புக்கு முடியலையா? வழக்கமா எங்களுக்கு முன்னாடி எழும்பி டீவி பார்த்துட்டு இருப்பே .. இன்னிக்கு இன்னமும் பெட்டை விட்டு இறங்கலியே " என்று கேட்டார்.
"ஆமா..டீவி பார்த்தால் அதை ஸ்டைல்னு சொன்னாலும் சொல்லுவாங்க "
"அப்படிக்கூட யாராவது சொல்லுவாங்களா? சும்மா கற்பனை பண்ணிக்காதே "
"ஆமாம்டா .. என்னை குறை சொல்லியே பழகிட்டீங்க. உன் பொண்டாட்டிக்கு தெரிஞ்ச வெளிநாட்டுக்காரி ஒருத்தி நேத்து நம்ம வீட்டுக்கு வந்திருந்தாள். அவ மூச்சுக்கு முன்னூறு முறை என்னிடம் "பெரியம்மா.. ஸ்டைல் பண்ணாதீங்க."னு சொன்னாடா . வாலிப வயசிலேயே ஸ்டைல்னா என்னனு எங்களுக்குத் தெரியாது. வயசான காலத்திலா அந்தக்கழுதையை பண்ணப் போறோம். மூச்சுக்கு முன்னூறு தடவை ஸ்டைல் பண்ணாதீங்கனு சொன்னா .. புதுசா வந்தவ கிட்டே என்ன வம்புனு பேசாமே இருந்துட்டேன்." என்று அம்மா சொல்ல, "ஏய் என்னடி இதெல்லாம்?" என்று கணவன் போட்ட கூச்சலில் அங்கு ஓடி வந்தாள் மனைவி.
அம்மா சொன்னதை அப்படியே மனைவியிடம் சொல்லி "இதுக்கு என்னடி அர்த்தம்?" என்று கோபமாக இரைந்தார் கணவர்.
ஒரு நொடி யோசனையில் ஆழ்ந்த மனைவி பெரிதான குரலில் சிரித்தாள்.
கணவனின் முறைப்பைக் கண்டதும் "அம்மாதான் அப்படி சொன்னா, நீங்க கொஞ்சம்கூட யோசிக்காமே நம்பிடுவீங்களா? அவ எதுக்கெடுத்தாலும் "ஸ்ட்ரைன் பண்ணிக்காதே"னு என்னையே சொல்லுவா. அதைத்தான் அம்மா கிட்டேயும் சொல்லி இருப்பா.. அவ ஸ்ட்ரைன்னு சொல்றதை உங்க அம்மா ஸ்டைல்னு புரிஞ்சுக்கிட்டாங்க." என்று சொல்லிவிட்டு மீண்டும் சிரிக்க ஆரம்பித்தாள். அந்த சிரிப்பில் கணவனும் கலந்து கொள்ள ஒன்றும் புரியாமல் விழித்த அம்மாவிடம் ஸ்ட்ரைன் ஸ்டைல் இரண்டுக்கும் உள்ள வித்தியாசம் பற்றி பாடம் எடுக்க ஆரம்பித்தார் மகன்.
No comments:
Post a Comment