படிக்க ஒரு நிமிடம் / ஒரு நொடி போதும். யோசிக்க ?.. (19)

"அரச மரத்து பிள்ளையாரைப் பிடிக்க வந்த "சனி", அரச மரத்தையும் சேர்த்து பிடிச்சுதுனு சொல்லுவாங்க. அது சரிதான் போலிருக்குது " என்று அம்மா சொல்ல, "என்னம்மா?!" என்று கேட்ட மகனிடம் " இந்த சென்னை சில்க்ஸ் தீப்பிடிச்சு எரிஞ்சதைத்தான் சொல்றேன். உங்க தாத்தா அடிக்கடி சொல்வார். ஆண்டவன் நொடிப்பொழுதில் எந்தவொரு கணக்கையும் மாத்தி அமைச்சிடுவான்னு. அது சரிதான். கடை எரிஞ்சது வேறே விஷயம். அதை நம்பி எத்தனை குடும்பங்கள் அங்கே வேலை பார்த்துட்டு இருந்திருப்பாங்க. நொடிப்பொழுதில் அவங்க நிலைமையே தலைகீழா மாறிப்போச்சே. ஸ்கூல் திறக்கிற நேரம் வேறே. வேலை பார்த்தவங்க மட்டுமா? எத்தனை துணி ஏஜென்சிங்க .. பாரம் தூக்கிறவங்க..வண்டி ஓட்டறவங்க...ச்சே. எத்தனைபேர் பாதிக்கப்பட்டு இருக்கிறாங்க. அக்கம் பக்கத்து கடைக்காரங்க தங்களோட பொழைப்பை பார்க்க முடியலே. தெரு வியாபாரிங்க... அதுஇதுனு ரெண்டு நாள் வியாபாரம், பொழைப்பு போச்சுதானே!" என்றவளிடம் "அம்மா ..அவங்களை நினைச்சு ரொம்ப பீல் பண்ணாதீங்க. அரசமரம் மட்டுமில்லே... நாம அத்தனை பேரும்தான் பாதிக்கப்பட்டு இருக்கிறோம்." என்ற மகனிடம் "என்னடா சொல்றே ?" என்று கேட்டவளிடம், "கட்டிடத்தை இடிக்க முன்னாடி அங்கே கொட்டறது க்காக லாரி லாரியா கல்லு மண்ணு கொண்டு வந்து இறக்கி இருக்கிறாங்க. அதற்கான விலை. வேலை செய்றவங்க கூலி லொட்டு லொசுக்கு செலவு எல்லாமே யாரோட பணம் ? அரசாங்க பணம். அதாவது நம்ம வரிப்பணம். அதை இப்படி தண்ட செலவு பண்ணிட்டு, பட்ஜெட்டில் விழுற துண்டு வேட்டி சட்டை இதை எல்லாம் சரிக்கட்ட எலெக்ட்ரிக் பில், தண்ணீர் வரி, பஸ் கட்டணம்ன்னு ஒவ்வொண்ணையும் ஏத்தி விடுவாங்க. இதுதானே காலங் காலமா நடந்துட்டு வருது. எலும்புத்துண்டை வீசினா போதும் சட்டத்துக்கு புறம்பா எந்த வேலையையும் செய்ய ஆளுங்க இருக்கிறாங்க. எலும்புத்துண்டை வீசினவன், அதைக் கவ்வி பிடிச்சவன் இவங்க ரெண்டு பேருக்கும் ஆதாயம். பின்னாடி பிரச்னைனு வரும்போது அது ஒட்டு மொத்த சமுதாயத்துக்கும் தண்டனை. அதான் சொல்றேன். அரச மரத்து பிள்ளையாரைப் பிடிக்க வர்ற சனி, அரச மரத்தை மட்டுமல்ல அத்தனை குடும்பங்களையும் சேர்த்துதான் பிடிக்குது!" என்று விவரம் சொன்னான் மகன்.