இம்சை அரசன் !?
நண்பனின் தங்கையின் கல்யாணத்துக்கு வந்திருந்த பரந்தாமனின் மனம் கல்யாண நிகழ்ச்சிகளின் பரபரப்பில் லயிக்கவில்லை. அதற்க்கு மாறாக வந்திருக்கும் இந்த நபர் யார் என்பதை அறிந்து கொள்ளும் ஆவலில்தான் அவனது முழுக் கவனமும் இருந்தது. யார் இந்த V I P . இவரை எந்தவொரு சினிமாவிலோ அல்லது அரசியல் மேடையிலோ, அவ்வளவு ஏன், வால் போஸ்டரில்கூட பார்த்தது இல்லையே. ஒரு வேளை கல்யாணத்துக்கு ஏதாவது பைனான்ஸ் விஷயத்தில் உதவி செய்திருப்பாரோ ? கல்யாணத்துக்கு வந்திருந்த அத்தனைபேரும் மேடை முன்பாக வரிசைப் படுத்தப்பட்ட இடத்தில் உட்கார்ந்திருக்க, வந்திருந்த அந்த நபரும் பத்தோடு பதினொன்றாக அங்கே உட்கார முயற்சிக்க, சடங்கு சம்பிரதாய விஷயங்களில் ஈடுபட்டிருந்த கோகுலின் அப்பா, மேடையை விட்டு இறங்கி வேகமாக ஓடி வந்து, " நீங்க அங்கே நம்ம வீட்டு ஆளுங்க பக்கத்திலேயே இருங்க " என்று சொல்லி கையைப் பிடித்து இழுக்காத குறையாக அழைத்து சென்றார். இன்று அதிகாலை யில் தன்னோடு சுவாரஸ்யமாக பேசிக் கொண்டிருந்த கோகுல், அந்த நபர் காரில் வந்து கல்யாண மண்டப வாசலில் இறங்கும்போது, பேச்சை பாதியில் நிறுத்திவிட்டு ஓடிப் போய் அவரை அழைத்து வந்ததையும் அங்கு நின்றிருந்த மற்ற உறவுகளிடம் அவர் பேச முயற்சி செய்த போது அதைப் பற்றிக் கவலைப் படாமல் "நீங்க வாங்க .. வீட்டில் எல்லோரும் உங்களுக்காக வெயிட்டிங். நேற்று ரிசெப்சனுக்கு நீங்க வருவீங்கன்னு அப்பா எதிர் பார்த்தார்" என்று சொல்லி அவரை தனி அறைக்கு அழைத்து சென்றதையும் இப்போது நினைவுபடுத்திப் பார்த்தான். கோகுலை அதன் பின் தனியாக சந்திக்கும் சந்தர்ப்பம் கிடைக்கவில்லை. அவர் பின்னாலே சென்று ஓடி ஓடி உபசரித்துக் கொண்டிருந்தான். அவன் ஏதாவது அவசர வேலையாக அங்கே இங்கே நகரும் போது கோகுலின் குடும்பத்தினர் ஒருவர் மாற்றி ஒருவர் அவருடன் ஏதாவது பேசிக் கொண்டிருப்பதையும் பரந்தாமன் கவனிக்கத் தவறவில்லை. அவர் யார் என்பதைத் தெரிந்து கொள்ளும் ஆவல் அதிகமானதற்கு காரணம், கோகுல் வீட்டினர் ஒருவர் மாற்றி ஒருவர் அவருக்கு பாடி கார்ட் மாதிரி இருந்து கவனித்துக் கொண்டதுதான்.
முகூர்த்தம் முடிந்து, கல்யாண சாப்பாட்டை ஒரு பிடி பிடித்துவிட்டு "குட் பை" சொல்வதற்காக கோகுலைத் தேடிய பரந்தாமன், கடைசியில் மாடியில் ஒரு தனியறையில் அவனைக் கண்டுபிடித்தான். கூடவே அந்த நபரும் இருந்தார். சைகை காட்டி அறைக்கு வெளியில் கோகுலை அழைத்து வந்த பரந்தாமன் , " யாருடா அந்த V I P . ஒட்டு மொத்த பேமிலியும் அவரை விழுந்து விழுந்து தாங்கறீங்க ! உங்க டென்சனைப் பார்க்கப் பார்க்க அவர் யார் என்கிறதைத் தெரிஞ்சுக்க ஆசையா இருக்கு " என்றான்.
"அடடா .. இதற்கா ஆசைப் பட்டாய் பரந்தாமா .. அவரைப் பத்தி அனுபவ பூர்வமா தெரிஞ்சுக்கோ. அவர் என்ன கேட்டாலும் ராங்க் இன்பர்மெசன் குடு " என்று சொல்லி அறைக்குள் அழைத்து சென்ற கோகுல், "சித்தப்பா இவன் என்னோட ப்ரெண்ட். நீங்க பேசிட்டு இருங்க . இதோ வந்துடறேன் " என்று சொல்லி சென்றான்.
"வாங்க தம்பி உட்காருங்க .. கோகுலோட வேலை பார்க்கிறாப்லேயா ?" என்றார்.
அவர் என்ன கேட்டாலும் ராங்க் இன்பர்மெசன் குடு என்று கோகுல் சொன்னது நினைவுக்கு வர, " வேலை தேடிட்டு இருக்கிறேன் " என்றான்.
"அடடா.. எவனாவது கட்சிக்காரன் மூலமா ட்ரை பண்றதுதானே, கவெர்ன் மெண்ட் ஜாப்க்கு .. பணம் போகுதேன்னு வருத்தப்படக்கூடாது. போட்ட முதலை ஈசியா வட்டியும் முதலுமா திருப்பி எடுத்துடலாம்" என்று சொல்லிவிட்டு பெரிதாக வாய் விட்டு சிரித்தார் அவர்
"அப்பா அதற்கு பிரியப் படமாட்டார் " என்றான் பரந்தாமன்
"சினி பீல்டுக்கு ட்ரை பண்றதுதானே "
"எனக்கு நடிக்க வராது "
"ஆமாம் .. அதெல்லாம் தெரிஞ்சா எல்லாரும் அந்த பீல்டில் இருக்கிறாங்க போன வாரம் ஒரு படம் பார்த்தேன் .. படம் பேர் என்ன எழவோ ... அது ஞாபகம் வரலே. அதிலே ஹீரோயின் அழறா குலுங்கி குலுங்கி.. அதைப் பார்த்துட்டு தியேட்டரில் எல்லாரும் குலுங்கி குலுங்கி சிரிக்கிறாங்க செமே காமெடி. யாரையாவது பிடிச்சு சினிமா சான்ஸ் வாங்கிடு .. ஏதாவது ஒரு குரூப் டான்ஸில் ஒரு ஓரமா தலை காட்டினால் கூட போதும். அதுக்குப் பிறகு ஏதாவது ஒரு மெகா சீரியலுக்கு ஹீரோ ஆயிடலாம். நடிக்கப் பிடிக்கலேனா கோரஸ் பாடக் கத்துக்கோ . பாடு .. ஏதாவது ப்ரொக்ராமுக்கு நடுவரா போயிடலாம் .. சினி பீல்டில் எதையும் கிழிக்க முடியாட்டா மேடையில் நடுவர் .. ஒரு விஷயம் என்னன்னா மேடையில் உட்கார்ந்திருக்கிற நடுவர்கள் முகத்தையும் உடம்பையும் அஷ்ட கோணல் பண்ணிக்கிட்டு அவங்களையும் கஷ்டப் படுத்திட்டு நம்மளையும் கஷ்டப்படுத்தி பாடற ஒரு பாடலை, குழந்தைங்க ரொம்ப அசால்ட்டா பாடிட்டுப் போயிடறாங்க . சினிமா நல்ல தொழில்தான் தம்பி. எத்தனை பேருக்கு சாப்பாடு போடுது ! " என்று அவர் சிரித்துக் கொண்டே சொல்ல அமைதியாக தலையாட்டினான் பரந்தாமன்.
"ஏற்கனவே படிச்சுப் போட்டு பிள்ளைக வேலையில்லாமே இருக்காங்க. வேலையில் இருக்கிறவங்களையும் ஏதாவது ஒரு காரணம் சொல்லி திடீர்னு நிறுத்திடறாங்க .. இந்த மாதிரி சூழ்நிலை வந்தா என்ன நடக்கும்? " என்று அவர் கேட்க, " என்ன நடக்கும் ?" என்று கிளிப்பிள்ளை மாதிரி கேட்டான் பரந்தாமன்.
"எங்கள் இயக்கத்துக்கு ஆட்கள் தேவை"னு சொல்லி தீவிரவாதிங்க பேப்பரில் விளம்பரம் கொடுத்தாலோ, அதில் சேர "நான் நீ"னு சொல்லி ஆணும் பொண்ணும் போட்டி போட்டுட்டு போனாலோ ஆச்சரியப்பட எதுவுமே இல்லே .. நீ எப்போ வேலையில் சேர்ந்து எப்போ கல்யாணம் பண்ணிக்கிறது? இப்போ இந்தக் கல்யாணப் பொண்ணுக்கு என்ன கொறச்சல்? மூக்கும் முழியுமா நல்லாத்தானே இருக்கிறா. இருந்தாலும் எத்தனை வரன் தட்டிப் போச்சு தெரியுமா? என்ன காரணம்? படிச்சிருக்கி றா .. ஆனால் வேலையில் இல்லை.. அந்த ஒரே ஒரு டிஸ்குவாலிபி கேசனில் நிறைய இடம் தட்டிப் போச்சு .. என் சொந்தக்காரன் ஒருத்தன். இப்போகூட இந்தக்கல்யாணத்துக்கு வந்திருக்கிறான். அவனோட பொண்ணுக்கு எத்தனை டிமாண்ட் தெரியுமா? ஆள் எப்படி இருப்பாங்கிறே ? கத்திரிக்காய்க்கு கைகால் முளைச்சாப்லே இருப்பா. அவ பக்கத்தில் காக்கா வந்து நின்னா, காக்காதான் வெள்ளைக்காரன் மாதிரி சிவப்பா தெரியும். அவளை பொண்ணு கேட்டு எத்தனை பேர் வரிசையில் நின்னான் தெரியுமா ? ஆனா வெளிநாட்டில் வேலை பார்க்கிற வரன்தான் வேணும்னு அவ சொல்லிட்டா .. லோக்கல் மாப்பிள்ளையை கல்யாணம் பண்ணிட்டு மாமியார் வீட்டில் யார் லோல் படறது?. வெளிநாட்டுக்கு போயிட்டு வருஷம் ஒருமுறை தாய் வீட்டுக்கு வரணும். வரும்போது ரெண்டு சாக்லேட்டை வாங்கிட்டு வந்து மாமியார் வீட்டில் குடுத்துட்டா அவங்க வாய் திறக்காமே சாக்லேட்டை சப்பிட்டு இருப்பாங்க. நமக்கு எந்த ப்ராப்ளமும் இருக்காதுன்னு சொல்றா. இப்போ பொண்ணுங்க ரொம்பவும் விவரமா இருக்கிறாங்க. வேலை தேடறதை விட்டுட்டு எங்காவது வீட்டோட மாப்பிள்ளையா போக ட்ரை பண்றதுதானே ?" என்று கேட்டு விட்டு அவன் முகத்தைக் கூர்ந்து பார்த்தார் அவர்.
"ட்ரை பண்ணிப் பார்க்கிறேன் "
"எதுவுமே ஒத்து வராட்டா கட்சியில் சேர்ந்துடு ... எந்த குவாலிபிகேசனும் வேண்டாம் ... அடிதடி அராஜகம் பண்ணத் தெரியணும் .."
"அதுக்கெல்லாம் என் மனசாட்சி இடம் குடுக்காது "
"விவரமில்லாத பிள்ளையா இருக்கிறேயே . அதைத் தட்டிக் குடுத்து தூங்க வச்சிடு. அரசியலில் பெரிய ஆளாகி ஜெயிச்சு வந்துட்டேனு வச்சுக்கோ அப்புறம் உன் காட்டில் மழைதான். நாம எதிர்க்கட்சியில் இருக்கும்போது எதையெல்லாம் குறைன்னு நாம சொன்னோமோ அது எல்லாம் எங்கேயும் உள்ளதுதான்னு நாம ஆளும் கட்சிக்கு வந்ததும் சொல்லணும். மற்ற இடங்களில் கம்பேர் பண்றப்போ இங்கே குறைவு தான்னு அடிச்சுப் பேச தெரியணும். ஜமாய்ச்சுடலாம் " என்று அவர் சொல்லிக் கொண்டிருக்கும்போது "டேய் கோகுல் எங்கேடா இருக்கிறே ? என்னைக் காப்பாத்துடா " என்று பரந்தாமன் மனதுக்குள் அலறிக் கொண்டிருந்தான்.
கோகுல் வரும் அறிகுறியே இல்லை .
"ஸார் .. போன் வைப்ரேசன் வருது .. அட்டெண்ட் பண்ணிட்டு வர்றேன் " என்று பொய் சொல்லி விட்டு அங்கிருந்து நகர்ந்த பரந்தாமன் கோகுலை தேடிக் கண்டுபிடித்தான்.
இவனைப் பார்த்ததுமே, " அடப் பாவி.. நீ இருக்கிற தைரியத்தில்தானே அவரைத் தனியா விட்டுட்டு வந்தேன் ..ஏன்டா கிளம்பி வந்தே ?" என்று பரபரத்தான் கோகுல்
"அடப்பாவி .. என்னைப் பழி வாங்க எத்தனை நாளாக் காத்திருந்தே .. என்னை ஏன் அவர் கிட்டே மாட்டி விட்டே ?"
"அவரைத் தனியா விடாமே ஓடி ஓடி உபசரிச்ச காரணம் என்னனு இப்போ உனக்குப் புரிஞ்சுதுதானே? சொந்தத்தில் முக்கியமான ஆள். கல்யாணத்துக்கு அவரைக் கூப்பிடாமலும் இருக்க முடியாது . ஆனால் அவர் இருக்கிற இடத்தில் ஒரு கலகம் வராமல் இருக்காது . மனுஷன் சகட்டு மேனிக்கு பேசி வம்பை விலைக்கு வாங்குவார்.அவர் பேசறதில் ஹன்றெட் பெர்செண்ட் நியாயம் இருக்கலாம். ஆனால் அதை யோசிக்கிற மனோபக்குவம் நமக்குக் கிடையாதே .. ஆத்திரத்தில் கோபப்பட்டுட்டு நிதானமா உட்கார்ந்துதானே வருத்தப்படுவோம் . எது சரி எது தப்புன்னு பிறகுதானே யோசிப்போம். இந்த மாதிரி எந்த வொரு பிரச்சினையும் வரக் கூடாதுனுதான் அவரை முழுக்க முழுக்க எங்க கஸ்டடியில் வச்சிருக்கோம் .. அவர் யாரிடமாவது பேசப் போயிடாமே இருக்கணும். நீ தாம்பூலம் வாங்கிட்டுக் கிளம்பு .. நான் அவருக்கு செக்யூரிடியா போறேன்" என்று சொல்லியபடியே கோகுல் மாடிக்கு ஓட, "இதுவும் வேண்டுமடா .. எனக்கு இன்னமும் வேண்டுமடா " என்று மனதுக்குள் பாடியபடி மண்டபத்தை விட்டு வெளியேறினான் பரந்தாமன்
No comments:
Post a Comment