"பாட்டி எங்கே இருக்கீங்க? உங்க பேரனை நாய் கடிச்சிட்டுது " என்ற கூக்குரல் கேட்டு கிணற்றடியில் துணி துவைத்துக் கொண்டிருந்த பாட்டி அரக்கப் பறக்க ஓடி வந்தாள். வீட்டு வாசலில் ஊரே கூடி நின்று கொண்டிருந்தது. "ஏன் பிராணனை வாங்கிறே? வாசலில் உட்கார்ந்து வேடிக்கை பார்த்திட்டுரு. துணித் துவைசிட்டு அஞ்சு நிமிசத்திலே வந்திடறேனு சொல்லிட்டுதானே போனேன். அதற்குள் இப்படி நாய்கிட்டே போய் கடி வாங்கிட்டு வந்திருக்கிறே? இப்படி ஏதாவது பண்ணுவீங்கனுதானே உங்க அம்மா உங்களை எங்கேயுமே அனுப்பறதில்லே. ஸ்கூலுக்கு லீவுதானே. பத்து நாளைக்கு கிராமத்திலே வந்து இருக்கட்டும்னு கெஞ்சி கூத்தாடி உங்களை இங்கே அழைசிட்டு வந்தேன். நாய்ட்ட கடி வாங்கிட்டு வந்திருக்கியேடா. உங்க அம்மா அப்பாக்கு நான் என்ன பதில் சொல்றது ? தங்கச்சியை பாரு எவ்வளவு சமர்த்தா இருக்கிறா. " என்று பரிதவிப்புடன் கேட்டாள் பாட்டி.
"கவலைப்படாதீங்க பாட்டி. வைத்தியரை கூட்டிட்டு வர மணி சைக்கிளை எடுத்துட்டு போயிருக்காப்லே " என்று ஒருவர் சொல்ல "அப்ப இப்ப வந்தாப்லே" என்று பிரபு சொல்ல " படவா ராஸ்கல். இப்பக்கூட உனக்கு குறும்பு பேச்சு போகலியாடா? " என்றாள் பாட்டி. திடீரென்று கூட்டத்தில் சலசலப்பு." பாட்டி வைத்தியரய்யா வந்தாசுது " என்று சொல்லி அனைவரும் வைத்தியருக்கு வழி விட்டு நின்றனர்.
நாய் கடித்த இடத்தை பரிசோதித்த வைத்தியர் " பயப்பட எதுவுமே இல்லே பாட்டிம்மா. நாய் கவ்வி இருக்கே தவிர கடிக்கலே. நாயோட பல்லு எங்கேயும் படலே. இந்த குளிகையை ரெண்டு வேளை சாப்பிட்டாலே போதும்" என்று சொல்லி சென்றதும் "அப்பாடா" என்ற பெருமூச்சுடன் கூட்டமும் கலைந்து சென்றது. எல்லாவற்றையும் ஒரு ஓரமாக நின்று வேடிக்கை பார்த்து கொண்டிருந்த மனோ " இன்னிக்கு வம்புக்கு யாருமே கிடைக்கலேன்னு நாய்கிட்டே வம்புக்கு போனியாடா பிரபு ?" என்று கேட்டாள்.
"ஒய்! எதாவது வாலாட்டினே உன்னை நான் கடிச்சிடுவேன் " என்றான் பிரபு
"சரிதான் போடா நாய்ட்ட கடி வாங்கிட்டு வந்து வீட்டுக்குள் வந்து வீரம் பேசுறியா?"
"ஆரம்பிசுட்டீங்களா உங்க சண்டையை? இந்தாடா ஹார்லிக்ஸ் சூடா இருக்கு. குடிசிட்டு வைத்தியர் குடுத்த மருந்தை வாயில் போட்டுக்கோ. சண்டை போடாமே சமர்த்தா இருங்கோ. நான் போய் துணியை துவைட்சு காயபோட்டுட்டு வந்திடறேன் " என்றாள் பாட்டி. வேலையை முடித்துவிட்டு வாசலுக்கு வந்த பாட்டி, கயிற்று கட்டிலில் படுத்தபடி ஏதோ யோசனையில் பிரபு இருப்பதைக்கண்டு " என்னடா குழந்தை ஏதோ ஆழ்ந்த சிந்தனையில் இருக்கியே என்ன விஷயம்?" என்றாள்
"ப்ச்" என்று அலட்சியமாக உதட்டை சுளித்தான் பிரபு.
"என்னனு கேளு பாட்டி" என்று கண் ஜாடை காட்டினாள் மனோ.
"அது என்னனு தெரியாட்டா உனக்கு தலை வெடிசுடுமே" என்ற பாட்டி "என்னடா குழந்தை அப்படி என்னதான் யோசனைன்னு சொல்லேன். நாங்களும் தெரிஞ்சுக்கிறோம் " என்றாள்.
"பாட்டி நீ கேட்கிறதாலேதான் சொல்றேன். இந்த மனோ கழுதைக்காக சொல்லலே. பாட்டி விச்சு வீட்டு நாய் ஏன் என்னை கடிட்சுது."
"எனக்கு எப்படிடா தெரியும். நீ ஏதாவது வம்பு பண்ணி இருப்பே. அது வாலை பிடித்து இழுத்திருப்பே. அது வலி தாங்காமே கடித்சிருக்கும் "
"இல்லே பாட்டி. அந்த நாய்தான் குரைக்குதே. பிறகு ஏன் கடிச்சுது ?"
"என்னடா சொல்லறே? "
"குரைக்கிற நாய் கடிக்காதுன்னு சொல்வாங்களே. அந்த நாய் எப்பவும் குரைட்சுகிட்டே இருக்குதே. பிறகு ஏன் கடிச்சுது?"
இதை கேட்டு பாட்டி சிரிக்க கோபமாக பார்த்தான் பிரபு.
"கோப படாதே குழந்தே !. கடிக்காத நாய்னு ஒன்னு உண்டா என்ன? கோபம் வந்தா எல்லா நாயும் கடிக்கத்தான் செய்யும். அது நாயோட பிறவி குணம்"
"பிறகு ஏன் பாட்டி குரைக்கிற நாய் கடிக்காதுன்னு சொல்றாங்க? "
"ஓ அதுவா ? நாய் குரைக்கிறபோது அதாலே எதையும் கடிக்க முடியாது. அது எதையாவது கடிக்கும் போது அதாலே குரைக்க முடியாது. இந்த பழமொழிக்கு இதுதான் அர்த்தம். இது தெரியாமே, அது குரைக்கிற நாய் ஆச்சே. கடிக்காதுன்னு நினைத்து அது வாயிலே கையை குடுத்தியா ? "என்று பாட்டி கேட்க சிரிப்பை அடக்க முடியாமல் வாய் விட்டு சிரித்தாள் மனோ.
"பாட்டி இப்போ நான் இவளை கடிக்க போறேன். அப்புறம் இவளுக்கு உள்ளூர் வைத்தியர் மருந்தெல்லாம் வேலை செய்யாது. i c u தான் சரிப்பட்டு வரும். சொல்லி வை " என்றான் கோபமாக.
"சரிதான் போடா. நாய்ட்ட என்ன வம்பு பண்ணினே அதை சொல்லு முதல்லே ., இப்ப என்ன யோசனையில் இருக்கிறே அதையும் சொல்லு"
"போடி புண்ணாக்கு பாட்டி கேட்டால் மட்டும்தான் சொல்வேன்."
"ஐயோ கேளேன் பாட்டி."
"பாட்டி நான் விச்சு வீட்டு நாய்க்கு பிஸ்கட் எடுத்துட்டு போனேன். அவங்க அம்மா, " நாய்க்கு பேதி ஆகுது. அதனாலே எதுவும் குடுக்க வேண்டாம்'னு சொன்னாங்க. அதனாலே அதுக்கு பிஸ்கட் குடுக்காமே அது முன்னாலே பிஸ்கெட்டை காட்டி மறைத்சு விளையாடினேன். அதுக்கு போய் அந்த நாய் கடிசிட்டுது பாட்டி " என்றான் பரிதாபமாக!
"நீ செஞ்சது தப்புதானே. நீ பசியா இருக்கும்போது உன்னோட கண் முன்னாலே சாப்பாட்டை காட்டிட்டு மறைசா உனக்கு எவ்வளவு கோபம் வரும்.ஒவ்வொரு மிருகமும் கோபத்தையும் சந்தோசத்தையும் ஒவ்வொரு விதமா காட்டும். ஆனால் நான் பசியாயிருக்கேன்னு சொல்ல எந்த மிருகத்துக்கும் தெரியாதே. அதனோட தேவையறிஞ்சு நாம்தானே கொடுக்கணும். நீ அதை செய்யாமே பசியா இருக்கும் நாய் முன்னாலே பிஸ்கட் பாக்கெட்டை காட்டி மறைச்சா அதுக்கு கோபம் வரத்தானே செய்யும். வாயில்லா ஜீவன் கிட்டே அன்பு காட்டறதை விட்டுட்டு வம்பு பண்ணலாமா அசடு ?" என்று கேட்டு பாட்டி சிரிக்க " ஸாரி பாட்டி. என்னோட தப்பு எனக்கு புரியுது. இனிமே அப்படி செய்ய மாட்டேன் ?" என்று பிரபு சொல்ல " போடா. கடைசிலே ஒரு நாய்கிட்டே நீ பாடம் கத்துக்கும்படி உன் நிலைமை ஆயிட்டேன்னு நினைசா மனசு வலிக்கத்தான் செய்யுது" என்று மனோ சொல்ல " மனசு என்னடி பெரிய மனசு? இப்போ நீ வாங்கப்போற உதையில் உடம்பு பூராவுமே வலிக்க போகுது" என்றபடி பிரபு எழும்பி வர. "பாட்டி காப்பாத்து பாட்டி!" என்றபடி பாட்டியின் பக்கம் ஓடி ஒளிந்தாள் மனோ.
No comments:
Post a Comment